Prachtige middei fol blaasmuziek mei Fryslân Brass

Alle banken beset, de kreake fol, sa’n 80 minsken hearden nei it wolkomswurd fan
Culturele Commissielid Johan de Lange.
Dernei gie it los mei in prachtich stik, Gaudete, Verheugt U.
Wat tapaslik op dizze tredde Advintssnein! It publyk geniette sichtber.

Fryslân Brass bestiet út muzikanten die’t harren spoaren ryklik fertsjinne ha yn de Fryske topbrassbands, u.o. Brassband De Wâldsang, De Bazuin Oenkerk, Soli Brass.
Ferskate blazers fertsjinje har brea yn de Fryske muzykwrâld as muzykdosint, dirigent, oaren dogge hiel wat oars bygelyks notaris, ambtner of directeur fan in grutte undernimming.

De muzyk klonk allegear as in klokje, al hiene de musici it wat krap yn it koor fan ’t Readtsjerkje. Krystferskes, Russische muzyk, Bulgaarse dûnsen, wat kaam der wat foarby! Alles waard ek nochris troch de leden op humoristyske wize oan elkoar praat.

Prachtich wie ek Little Drummer Boy mei yn de haadrol slachwurker Sierk Bosgraaf.

Tige tank, mannen fan Fryslân Brass! It wie geweldich! Wa’t in stikje hearre wol, druk op it reade knopke, set it lûd oan en genietsje!
Moaie Krystdagen!

Tekst: Grytsje Dijkstra