Optreden Marjolein Meyers yn it Readtsjerkje op 25 novimber 2018
Sa mar in sneintomiddei yn Readtsjerk; it is wachtsje op publyk, dat it wol wat ôfwitte lit.
Mei in hândsjefol minsken slút de doar. Jammer; dy’t der net binne witte net wat se misse.
Te folle flecht op de koai yn it Fryslân fan de Kulturele Haadstêd of dochs in (te?) grut kultureel oanbod op de snein?
Marjolein Meyers nimt it licht op”We spylje altiten allinne foar it publyk dat der is.”
Wat folget is net te beskriuwen; mei sels skreaune autobiografyske ferskes nimt Marjolein ús mei nei har jeugd. As jongere suske bot narre , mar as it der op oan komt giet harren âldere bruorke foar har troch it fjoer! Haat is leafde, safolle is wol dúdlik. Tige werkenbar allegear.
En dan de mânnen dy’t har begeliede, firtuoos op banjo, fioele, akkordeon, kontrabas, doedelsek en wat al net…
Ierske folkmuzyk, cajun, it makket net út of se spylje it. Mei fjirtich jier op de planken kinne se kieze ut in wiidweidich repertoire.
Dêrneist binne de mânnen bruorren en ien de man fan Marjolein. Dat de muzyk is wol in famyljeferhaal.
Nei oardeheal ûre en noch twa kear in tajefte kinne we foldien op hûs oan.
Johan de Lange
Kulturele Kommisje fan it Readtsjerkje